٢ - قطر محمد شرف

القطر .. و معضلة القطر كما تحدث عنها المبدع محمد شرف في افضل مشاهده علي الاطلاق في فيلم اسف علي الازعاج .. 

انت مش عارف هم بيتكلموا علي انهي قطر و ازاي اصلا في قطر .. العمر اللي بيجري قطر و التعليم و الجواز قطر .. جتي الحب قطر .. و كلها محطاتها واحده في البداية و لكن شوف هتقابلها فين .. هتحب ولا لا .. هتلاقي صحاب ولا لا .. هتذاكر و تنجح في الحياة اللي هم شايفنها ولا لا .. العمر هيجري بيك ولا هتلحق تركب قطره ..

القطر في حد ذاته مشكلة .. و مين يقولك انك اصلا واقف علي الرصيف الصح للقطر .. مين يقول انك في المجال الصح في دراستك او شغلك و مين يقول ان البنت دي تستاهل و مين يقول انك اصلا تستحق انك تركب القطر و مين و مين .. 

انت تحدد بناء علي ايه .. اذا كنت انت معرفتش ان فيه قطر الا من فيلم في يوم من الايام يعني لو مشوفتش مكنتش عرفت ان فيه قطر و انك لازم تدور علي محطتك .. القطر في حد ذاته مين يقول انه هيفلك و مين يقول انه هييجي في نفس المحطة و مين اللي سايق و كحدد لمين يقف .. و مين اللي بيمشي القطر و مين القطر و مين انت.. 

القطر وهم انا و انت اخترعناه علشان نرمي عليه الهموم و المشاكل .. الوهم اللي اكتر الناس فينا مش عارفينه و اللي عرفوه فاتهم و اللي ركبوه اتقلب بيهم .. 

ف مش مستني القطر و اركبوا فيه كلكم انا هاخد تاكسي ..