٥ - معضلة المرض النفسي

الاكتئاب الغير معترف بيه .. 

من واقع خبرتي - الصفرية و لكن الشخصية - أن الاكتئاب في حد ذاته ممكن يكون مرض عضوي عقلي اكتر منه نفسي و ان العقل نفسه بيفضل ياخد في خوازيق لحد ما الحتة بتاعت الراحة اللي بتريح الجسم تصغر و تصغر و بناء عليه متقدرش تكفي الجسم من اياً كان الهرمونات اللي بتتفرز جوا الجسم علشان الجسم يرتاح و يبطل ياكل في نفسه  .. و ده فيه كمية هبد علمي عالمية لكن هذه وجهة نظر شخصية .. 

انا ممكن اكون عندي اكتئاب لا انكر شئ زي ده و لا افتخر بيه و لكنني متقبله و لكن مشكلتي الاكبر في عدم تقبل من حولي لحالة الاكتئاب دي و تفسيرها علي انها بعد عن ربنا او ان امي مش راضية عني او انه حسد و هكذا و ده شئ جميل ان لكل حاجة تفسير امهاتي شويتين و لكن انا مشكلتي الاكبر هي ان محدش حاسس .. انا نفسي لما بكلم حد تعبان نفسيا بطلت اقوله انا حاسس بيك لان ده هري .. محدش حاسس بحد .. ممكن تكون بتشاركة كنوع من المشاركة و بكن انت مش حاسس ببصلة .. انت بس عامل حاسس علشان تخفف عنه الموضوع ده .. لشان كده قررت اقرا و اتكلم علمى شويه و نبعد عن الهبد.

ندخل بشكل علمي شوية من شوية مصادر قعدت اقرا فيها، حسب  او منظمة الصحة العالمية  " الاكتئاب يؤثر على أكثر من 300 مليون شخص و وفي كل عام يموت ما يقارب 800000 شخص من جراء الانتحار الذي يمثل ثاني سبب رئيسي للوفيات بين الفئة العمرية 15-29 عاماً." و ده في حد ذاته رقم مرعب و كافي من غير اي كلام حتي منِّى ان الاكتئاب بيقتل مئات الآلاف كل سنة .. ممكن من غلط في التشخيص فبيلجئوا للانتحارزي ما المقال بيقول علشان يرتاحوا - من وجهة نظرهم - و ممكن برضو من انكار المجتمع اللي حواليهم ليهم و وصمة العار اللي بيكتسبها مريض الاكتئاب و ده بيحسسه بالوحده و الانعزال اكتر و اكتر و ان وجوده في الحياه دي ملوش لازمة .. ف يعمل ايه، يلجأ لاسهل حاجة تتعمل .. انه ينهي حياته.

و لعل اشهر الانواع دي لما قريت عنهم هو " اضطراب الاكتئاب المتكرر " و زي ما المقال بيقول نصاً "ينطوي هذا الاضطراب على نوبات اكتئاب متكررة. وخلال هذه النوبات، يعاني الشخص من اعتلال الحالة المزاجية، وعدم الاهتمام والتمتع بالأشياء، وتدني الطاقة مما يؤدي إلى قلة النشاط لمدة أسبوعين على الأقل. ويعاني كثير ممن يمرون بحالات اكتئاب كذلك من أعراض القلق، واضطراب النوم والشهية، وقد يكون لديهم شعور بالذنب أو قلة تقدير الذات وضعف التركيز، بل وحتى أعراض بدون تفسير طبي."

لما قريت حسيت ان ده انا و إن ناس كتير ممكن تكون داخلة تحت مظلة النوع ده من الاكتئاب بالذات لو ملهاش تاريخ مع المرض نفسه .. تحسها بالبلدي كده اول ليڤل قبل الوصول للوحش ده اسهلهم و اهونهم علي الصحة و لكن من وجهة نظري الشخصية هي اخطرهم علشان من كتر ما هي بسيطة الناس مبتاخذش بالها منها .. الموضوع شيق للقراية عنه - مش بقلل من حجمة - و هتحب تعرف اكتر علشان تعرف ازاي تتعامل معاه سواء مريض معين او حتى لو شايف علي نفسك الاعراض دي.

المقال زي ما هو صادق و صادم في الارقام و الكلام و لكنه برضو بيقدم ابسط التفاسير للموضوع مع خلول متوسطة و بسيطه لحين ان يكون عندك القدرة انك تتابع مع طبيب نفسي متخصص .. و لكن زي حالاتي معنديش هيبقي المقال ده اول الطريق اللي يفتحلك باب للقراية.

هسيب تحت لينك الموقع و بعض الحلقات علي YouTube اتكلمت عن اشيا تتعلق بالموضوع ده  بتفاصيل شوية من اكتر من قناة تعليمية تبسيطية - مش مسلمات لازم تقرا بنفسك - .. اقرا و اتعلم و شاركنا اتعلمت ايه.

مقال The Who : 

https://www.who.int/ar/news-room/fact-sheets/detail/depression

**********************************

حلقات الدحيح:

الطب النفسي: 

https://youtu.be/ftbgcarkxS0

الوحدة:

https://youtu.be/aKrXC_QdfMA

الضغط العصبي:

https://youtu.be/8s3waZw1as0

**********************************

حلقة فارماستان :

https://youtu.be/P15Hl6M_fIo

**********************************

حلقات الاسبتالية:

الالم الاجتماعي:

https://youtu.be/UwUTbknU7rA

الملل:

https://youtu.be/XUpaNV7Jbtk

**********************************