٣ - صوتي عامل ازاي

من اكتر المواضيع و اخطرها عندي من وجهة نظري موضوع اني ساعات فعلا بنسي صوتي صوته ايه من قلة ما بتكلم علشان كده ممكن الايام دي بدور علي طرق كتير اني اتكلم في اي حته حتي لو هقول اي كلام مش فارقة .. سواء لشخص او لابلكيشن موبايل او حتي لسحسو " القطة بتاعتي" و ده اللي مخليني تقريبا ابتديت اكتب علي تويتر و عملت تيك توك لغرض اني اتكلم مع الناس و شكلي هخليها انستجرام علشان الاقي حد يرد عليا الكلام .. 

لكن اللي فعلا مخليني قلقان اني ليه اصلا اوصل للمرحلة دي اني انسي صوتي عامل ازاي او اني اقعد بالايام من غير اي كلمة .. ليه اصلا اوصل اني مليش اي حد اتكلم معاه في اي وقت .. اها انا ممكن حواليا ناس من اصدقائي او كده لكن مش حاسس اني ممكن في اي وقت امسك الموبايل و اكلمهم و اقعد احكي .. و ده في حد ذاته الرعب الاكبر انك تلاقي الف حد عندك و مفيش فيهم حد ينفع تقوله صباح الخير من غير ما تندم بعدها .. 

الموضوع غريب و انا مش حابه و لكن اديني بحاول اساعد نفسي واحده واحده و ارجو ان في يوم من الايام الاقي حل علشان الموضوع ميكبرش و احس ان كلامي مش مهم انه يحصل و ان السكوت احسن بكتير .. 

انا نفسي مش من هواة الكلام و لكن السكوت في حد ذاته ده خنقة .. انك تحس ان صوتك مكتوم لدرجة انها ساعات تحصل في الاحلام ده شئ مرعب.